KUGIRA IMIBEREHO YA GIKRISTO AHO TURI HOSE – Muhimpundu Rose
Rom 12:17-21
[17]Ntimukīture umuntu inabi yabagiriye. Mwirinde kugira ngo ibyo mukora bibonekere abantu bose ko ari byiza.
[18]Niba bishoboka, mu rwanyu ruhande mubane amahoro n’abantu bose.
[19]Bakundwa, ntimwihōranire ahubwo mureke Imana ihōreshe uburakari bwayo, kuko byanditswe ngo “Guhōra ni ukwanjye, ni jye uzītura, ni ko Uwiteka avuga.
[21]Ikibi cye kukunesha, ahubwo unesheshe ikibi icyiza.
Dusomye ijambo ry’Imana aho Pawulo ahugurira abantu kugira imibereho ya gikiristo, kuko kuba umukristo ni ubuzimanbwa buri munsi.
Dukurikije ibyo dusomye aha bitwereka ko ahari abantu hatabura urunturuntu. Kandi ibyo tubona uyu munsi ntago Ari bishya na kera kose byahozeho.
Ikindi umuntu agizwe n’abandi. Bivuze ko utabaho wenyine byanze bikunze ubana n’abandi mu cyiciro cyose cy’ubuzima waba urimo. Ndetse igihe cyose wisanga muri sosiyete runaka waba ubishaka cyangwa utabishaka.
Ikindi bene data ni uko uko tubayeho hari ikintu kiba kigutandukanya na mugenzi wawe, haba uburyo muteye,imyitwarire, imyumvire n’ibindi. Usanga ntawe ubihuje n’undi ariko Na none ugasanga biruzuzanya.
Aha rero nk’umukristo nkwiriye kubaho nte?
Mu buzima bwose tunyuramo umukristo ni urumuri. Ariko nyamara no mu bakristo habaho guhemukirana, habaho intonganya, habaho imanza, habaho kutihanganirana n’ibindi …
Wakwibaza uti ese mu bakijijwe ibyo byabaho bite?
Ni Ikibazo nibaza nawe wakwibaza.
Ariko nyamara kubera ko buri muntu ateye mu buryo butandukanye n’undi akenshi dusanga ibyo byabaye.
Ubu mu biganiro by’abantu ntihaburamo kumva ko hari uwahemukiwe. Hari umuntu ubera abandi igisitaza, hari umuntu runaka uhora ugirana ibibazo n’abandi .Kandi akenshi ugasanga uwateje ikibazo ni uwo mu nzu y’Imana.
⏩ Ese umukristo nyakuri yakwitwata ate?
Pawulo yatanze izi mpuguro ati:
- Ntimukiture umuntu inabi yabagiriye.
2.Ibyo mukora bibonekere abantu Bose ko Ari byiza. - Ku rwanyu ruhande mubane n’abantu Bose amahoro
- Ntimwihoranire
5.Ikibi cye kukunesha
Ibi bintu uko ari 5 ndaagira ngo buri wese yisuzume arebe uko ahagaze
- Ese ndababarira cyangwa igihe hari umpemukiye nanjye ncura umugambi w’uburyo nzabimwishyura?
- Ese sosiyete mbamo mberera imbuto nziza, cg nifatanya n’ikibi ?
- Ese mparanira kubana n’abantu bose amahoro, cyangwa ni njye uhora mu makimbirane n’abandi? Aho ndi abandi baba bitwararitse ngo batankoma?
- Ese Aho sinkoresha imbaraga n’ubushobozi Imana yampaye kugira ngo nihimure ku bandi?
- Ese mparanira kuneshesha ikibi icyiza. cyangwa ndeka ikibi kikanyobora mu buzima gishaka?
Bene data uyu ni umwanya wo kwisuzuma, ndagira ngo murebe neza izo ngingo eshanu, twe abizera b’uyu munsi turamutse tuzubahirije.
Amahoro yasesekara aho tuba ndetse no mu itorero.
Nsoje mbifuriza kugira imibereho ikwiriye abakristo aho muri hose.
Kandi dushobozwa byise na Kristo uduha imbaraga
Ev. Muhimpundu Rose